मन्त्री निषेध जुइवं कर्मचारीलिसे कचमच
येँ (सन्ध्या टाइम्स)/आन्दोलन यानाच्वंपिं स्थानीय निकायया कर्मचारीतय्सं आवंलि वर्तमान सरकारया मन्त्रीतय्त स्थानीय निकायय् प्रवेश निषेध यायेगु नापं सरकार विरुद्ध नारा च्वयाः स्थानीय निकायय् तयेगु धकाः याःगु निर्णययात कयाः कर्मचारी व सरकार दथुइ कचवं पिहां वःगु दु। सरकार व मन्त्रीपाखे केन्द्रित जुइगु थज्याःगु निर्णय याःगु कारणं वर्तमान सरकारय् दुगु नेपाली कांग्रेस व नेकपा (एमाले) नाप लिक्क लाःगु कर्मचारी संगठनया नेतृत्व व मन्त्रीतय् दथुइ कचमच जूगु खः। स्थानीय निकाय संयुक्त आन्दोलन केन्द्रीय समन्वय समितिइ दुथ्याःगु न्यागू कर्मचारी संगठनत मध्ये नेपाली कांग्रेस नाप लिक्क लाःगु स्थानीय निकाय कर्मचारी यूनियन व नेकपा (एमाले) नाप लिक्क लाःगु स्थानीय निकाय कर्मचारी संघ नेपालया नेतृत्व व मन्त्रीतय् दथुइ कचमच जूगु खँ छम्ह कर्मचारीं 'सन्ध्या टाइम्स'यात कनादीगु दु। उगु समितिइ एनेकपा (माओवादी) नाप लिक्क लाःगु नेपाल राष्ट्रिय कर्मचारी संगठन स्थानीय निकाय नं दुथ्यानाच्वंगु दु ।
थ्व हे दथुइ स्थानीय निकायया कर्मचारीतय्सं थनिंनिसें हे मन्त्रीतय्त थःपिनि ज्याकुथी निषेध यायेगु नापं स्थानीय निकायय् कर्मचारी एकता जिन्दावाद-अनउत्तरदायी सरकार मुर्दावाद धकाः नारा च्वयाः हाकुगु ब्यानर तयेत्यंगु दु ।
