फोहोरं दयेकातःगु सोफा व खाता
येँ (सन्ध्या टाइम्स्)/छेँय् उत्पादन जुइगु फोहोर मुं मवःगु कारणं अस्तव्यस्त जूगु राजधानी नकतिनि सफा जुइगु क्रम न्ह्यात। तर अज्याःगु कपाः स्याइगु फोहोरयात नं सःसा झीगु थःगु हे छेँय् ब्वयेगु बांलाःगु ज्याय् छ्यले फइगु जुयाच्वन धइगु खँ भाजु राजु खड्कां क्यना बिउगु दु ।
छेँय् उत्पादन जुइगु अज्याःगु हे फोहोरपाखें दयेकातःगु थीथी हलंज्वलंया ब्वज्या राजु खड्कां आः नकतिनि यात। खड्कां बबरमहलया नेपाल आर्ट काउन्सिलय् अज्याःगु ब्वज्या यानादीगु खः ।
आर्किटेक् डिजाइनिङ ब्वनाच्वंम्ह वय्कलं अन थीथी फोहोर हलंज्वलं छ्यलाः दयेकातःगु सोफा, खाता, दराज, फ्रेम, टेबुल आदि थेंज्याःगु ज्वलं ब्वयातःगु दु। उगु सामान झीसं अनावश्यक धकाः वांछ्वगु भ्वंयागु बाकस, प्लास्तिक, सिँचुं, बोरा, बोर्ड मार्कर, थर्मोकोल, खरानी व अज्याःगु हे ज्या मवःगु ज्वलं छ्यलाः दयेकादीगु खः ।
दछि न्ह्यः सिद्धार्थ आर्ट ग्यालरीइ वय्कलं थुकिया न्हापांगु प्रदर्शन यानादीगु खः। च्यादँ तक यानादीगु अध्ययनया लिधंसाय् झिला बिकाः वय्कलं थ्व ज्वलं तयार यानागु खँ कनादीगु दु। थज्याःगु ज्याय् वय्कःया छेँजःपाखें नं तःधंगु तिबः प्राप्त जूगु दु। भविष्यय् वनाः थज्याःगु हे ज्या लगे मजूगु वस्तु छ्यलाः छखा छेँ हे दनेगु वय्कःया ग्वसाः दु।
थम्हं थ्व ज्या यानागुया उद्देश्य ज्या लगे मजूगु धकाः वांछ्वयातःगु फोहोर ज्वलंपाखें नं थज्याःगु आकर्षक ज्वलं दयेके जिउ धकाः क्यनाः जनचेतना थनेगु खः धकाः नं वय्कलं कनादिल ।
