'इलय् हे माओवादी लडाकु व्यवस्थापन जुइ'
प्रधानमन्त्री माधवकुमार नेपालं कार्ययोजनाया साथ वर्तमान सरकार न्ह्याः वनाच्वंगुलिं निर्धारित इलय् हे माओवादी लडाकुया व्यस्थापन जुया: शान्ति प्रकृया निष्कर्षय् थ्यंनिगु विश्वास प्वंकादीगु दु ।
मंगलवाः सुथय् राष्ट्रपति डा. रामवरण यादव नाप जूगु खँल्हाबंलाय् वयेकलं थीथी बाधा अवरोधया दथुइ नं माओवादी लडाकुया व्यवस्थापन इलय् हे यायेत थःम्हं कुतः यानाच्वंगु धयादिल । नापं वयेकलं लडाकु व्यवस्थापन यायेगु निंतिं विशेष समितिं आवश्यक ज्या यानाच्वंगु जानकारी बियादिल ।
अथेहे वयेकलं थः मातहतया माओवादी सेनाया रेखदेख, समायोजन व पुनस्थापना सम्बन्धी विशेष समितिया दुजः सचिव माधव घिमिरेयात आइतवाः खुइन्हुया दुने समायोजन व पुनस्थापना क्वचायेकेगु कथं कार्ययोजना दयेकेत निर्देशन बीधुनाःगु जानकारी बियादिल ।
राष्ट्रपति भवन शितल निवासय् जूगु खँल्हाबंलाय् प्रधानमन्त्री नेपालं शान्ति प्रकृयायात निष्कर्षय् मथ्यंकूसें संविधान जारी याये थाकुइगुलिं थः न्हापा शान्ति प्रकृया क्वचायेकेत लगेजुयाच्वनाःगु धयादिल ।
