संविधान निर्माण मजुतल्ले वर्तमान सरकार : देउवा
नेपाली कांग्रेसया वरिष्ठ नेता शेरबहादुर देउवां संवैधानिक प्रकृया पाखें सरकार परिवर्तन यायेगु स्वभाविक जुसां संविधान निमार्ण मजुतल्ले वर्तमान सरकारया विकल्प मदुगु खँ धयादीगु दु ।
हेटौंडाय् मंगलवाः संचारकर्मीत नाप खँल्हाबंला यानादिसें नेता देउवां संविधान जारी यायेधुंकाः जक थ्व सरकारया विकल्पया बारे बिचाः यायेफइगु धयादिल । सरकार परिवर्तन जुइगु चर्चा जुयाच्वंगु इलय् वयेकलं तत्काल अज्याःगु सम्भावना मदुगु खँ धयादिल ।
वयेकलं देशय् संसदीय प्रजातन्त्रया संस्कार दुगु संविधान आवश्यक जूगु खँय् बः बियादिसें एकदलीय तानाशाही संविधान निर्माण यायेत स्वःसाः उकीया कांग्रेसं सशक्त प्रतिकार याइगु धयादिल । अथेहे वयेकलं संविधान निर्माण याये न्ह्यः माओवादी लडाकुतय् व्यवस्थापन यायेमाःगु धयादिसें लडाकुया समायोजन मयासें संविधान घोषणा याःसाः दिगो शान्ति मजुइगु व न्हूगु संविधानय् नं प्रतिकुल लिच्वः लाइगु धयादिल ।
