'लडाकुतय्त पार्टीया सार्वजनिक ज्याझ्वलय् यंकेमते'
सत्ता साझेदार झिगू दलं माओवादी लडाकुयात पार्टीया सार्वजनिक ज्याझ्वःलय् ब्वति मयायेत इनाप याःगु दु ।
सोमवाः च्वंगु सत्ता साझेदार झिगू दलया बैठकं लडाकुया रेखदेख, समायोजन व पुनस्थापना विशेष समितिं चेन अफ कमाण्ड सम्बन्धी कार्यविधि पारित यानाः लडाकुतय्त औपचारिक रुपं सरकारया मातहत हयेधुंकूगुलिं पार्टीया ज्याखँलय् मयंकेत इनाप याःगु दु ।
सूचना व संचार मन्त्री नापं सरकारया प्रवक्ता सूचना व संचार मन्त्री शंकर पोखरेलं जनयुद्ध दिवसया लसगताय् माओवादीं येँया तिंख्यलय् मार्च पास यायेगु खँ वयाच्वंगुलिं झिगू दलया बैठकं माओवादीयात सार्वजनिक समारोहलय् लडाकुयात ब्वति मयायेत इनाप याःगु कनादिल ।
बैठकं कर्णली लगायतया विकास निर्माणया ज्याया अवरोध मयायेत माओवादीयात इनाप यायेगु नापं संविधान निर्माणया ज्यायात ग्वाहालि यायेगु लगायतया निर्णय याःगु दु ।
अथेहे बैठकय् गृहमन्त्री भीम रावलं भारतपाखें सुपुर्दगी सन्धी व भारतया एयर मार्सल तयेगु निंतिं याःगु इनापया सम्बन्धय् जानकारी बियादीगु खःसा उकीया बारे बैठकय् सामान्य सहलह नं जूगु खः ।
