गृहमन्त्रीयात लिसः बीत निर्देशन बीवं सदन सुचारु
एनेकपा (माओवादीं) सिन्धुलीया झागाझुली घटना सम्बन्धय् सरकारं सत्यतथ्य जानकारी बीमाःगु माग यासें आइतवाः निसें सदन बहिष्कार यानाच्वंगु इलय् सभामुख सुवासचन्द्र नेम्वाङं गृहमन्त्रीयात उगु घटनाया बारे लिसः बीत निर्देशन बीवं सोमवाःया संसद सुचारु जूगु दु ।
माओवादीं वंगु माघ १५ गते सिन्धुलीया झागाझुली घटनाय् एमालेया युवा संगठनया कार्यकर्तां थःपिनिगु कार्यकर्तायात आक्रमण यानाः सिन्धुली ल्वाभः हःगु धासें उगु घटनाया बारे सरकारं सत्यतथ्य जानकारी बीमाःगु माग यानावःगु खः ।
माओवादीं एमालेया केन्द्रीय दुजः केशव देवकोटा व युवाः संघया अध्यक्ष महेश बस्नेत सहितया नेता गयावःगु गाडीं छपू पेस्तोल व उकीया गोली सहितया ल्वाभः बरामद यानाः प्रहरीयात लःल्हानाःगु दाबी याःगु दु । एमालें धाःसाः थःपिनि कार्यकर्तायात माओवादीया कार्यकर्तां सुनियोजित रुपं आक्रमण याःगु द्वपं ब्यूगु दु ।
घटनाया छानविन यायेत उच्चस्तरीय राजनीतिक संयन्त्रं स्वंगू दलया प्रतिनिधि दुथ्याःगु छानबिन समिति गठन यायेधुंकूगु दु ।
