जनजातिया नायः हे जनजाति हकया विरुद्ध
येँ (सन्ध्या टाइम्स)/नेपाःया आदिवासी जनजातितय्गु मंकाःगु संगठन नेपाल आदिवासी जनजाति महासंघया नायः नापं संविधानसभाया दुजः पासाङ शेर्पा नेपाःया आदिवासी जनजातिया सवालय् निपाः ख्वाःपाः क्यनाः न्ह्याः वनाच्वंगु प्रमाणित जूगु दु ।
नेवाः स्वायत्त राज्य घोषणा सभाय् जुइमा बाय् आदिवासी जनजातिया छुं नं कथं ज्याझ्वलय् जुइमा, आदिवासी जनजातिया अग्राधिकार, आत्मनिर्णयया अधिकार, जातीय स्वायत्तता वा स्वशासन मंत धाःसा छम्ह हे नेतायात बाँकी तये मखु धकाः आक्रमक भाषण यानादीम्ह अध्यक्ष पासाङ शेर्पां लिपांगु इलय् वयाः जनजातियात अग्राधिकार बी मजिउ धकाः न्ववायेगु शुरु याना हःगु दु। अथे हे मेगु छगू थासय् वय्कलं आदिवासी जनजातियात आत्मनिर्णयया अधिकार नं बी मजिउ धकाः न्ववानादीगु दु ।
वंगु शनिवाः नेकपा (एमाले) संसदीय दलया बैठकय् एमालेपाखें सभासद जुयादीम्ह भाजु शेर्पां आदिवासी जनजातियात अग्राधिकार बी मजिउ धकाः न्ववानादीगु खँ एमालेया छम्ह केन्द्रीय नेतां कनादीगु दु। अथे हे छुं दिं न्ह्यः जक संविधानसभाया राज्य पुनर्संरचना नापं राज्य शक्ति बाँडफाँड समितिया मुँज्याय् नं वय्कलं आत्मनिर्णयया अधिकार बी मजिउ धइगु बिचाः तयादीगु खः ।
आदिवासी जनजातिया हितय् सक्रिय जुइमाःगु संस्थाया नायःपाखें थथे आदिवासी जनजातियात आत्मनिर्णयया अधिकार व अग्राधिकार बी मजिउ धकाः न्ववायेगु शुरु याना हःगुलिं थ्व ला वय्कःया निपाः ख्वाःपाः जुल धकाः जनजाति कार्यकर्तातय्सं धायेगु शुरु याना हःगु दु ।
