'नेपालय् 'भारतविज्ञ' छम्ह हे मदु'
येँ (सन्ध्या टाइम्स)/सीमाविद् बुद्धिनारायण श्रेष्ठं भारतीय तत्वत नेपाःया राजनीतिइ दुने च्वनाः पार्टीयात मखुगु लँय् यंकेगु व थःगु स्वार्थ पूरा यायेगु ज्या यानाच्वंगु दुसां नेपाःयाके धाःसा भारतविज्ञत हे मदयेका च्वनेमाःगु कारणं हे सीमा समस्या समाधान याये मफयाच्वंगु खः धयादीगु दु।
वय्कलं न्हापा भारतविज्ञ यदुराम खनाल, क्षेत्र विक्रम राणा, चन्द्र बहादुर थापापिं दुगु खः आः वय्कःपिं मदयेधुंकूगु अवस्थाय् भारत विज्ञत मदु धयादिल ।
नेपाः भारतया सीमा समस्या समाधान यायेत कुटनीतिक रुपं ज्या न्ह्याकेत भारतविज्ञत माःगु बिचाः नं सीमाविद् भाजु श्रेष्ठं प्वंकादिल ।
'सन्ध्या टाइम्स'लिसे खँ ल्हासें वय्कलं नेपाःविज्ञत भारतयाके यक्व हे दुगु जक मखु नेपाःया सरकारत भारतया इसाराय् चले जुयाच्वंगु कारणं हे नेपाःया ५४ गू थासय् भारतं सीमा अतिक्रमण याःसां नेपाःया सरकारं छुं हे याये मफयाच्वंगु खः धकाः नं वय्कलं धयादिल। श्रेष्ठं आः तत्कालया निंतिं सरकारं सीमा लागाय् सशस्त्र प्रहरी यक्व हे अप्वयेकेमाःगु अवस्था दु धकाः नं धयादिल ।
