धिमाल स्वायत्त क्षेत्रया माग
येँ (सन्ध्या टाइम्स)/संविधानसभा राज्य पुनर्संरचना तथा राज्य शक्तिया बाँडफाँड समितिं आः नकतिनि प्रस्ताव याःगु १४ प्रदेशया नक्साय् अरुण पूर्वया लिम्बुवानय् लाःगु मोरङ, झापा व सुनसरी जिल्लायात 'मिथिला-भोजपुरा-कोच-मधेश' प्रदेश कथं न्ह्यथनातःगु खँयात उगु हे लागाय् च्वंपिं धिमाल जातिं विरोध याःगु दु ।
संघीय लोकतान्त्रिक राष्ट्रिय मंच सम्बद्ध संघीय लिम्बुवान राज्य परिषद् अन्तर्गत संघीय धिमाल स्वायत्त परिषदं संविधानसभाया थ्व प्रस्तावया विरोध यासें उगु प्रदेशयात लिम्बुवान राज्य अन्तर्गत धिमाल स्वायत्त क्षेत्र घोषणा यायेमाः धकाः नं माग याःगु दु ।
यदि थ्व लागायात मेगु प्रदेश घोषणा यानाः लिम्बुवान कुचा यायेगु स्वत धाःसा बांलाइ मखु धासें धिमाल स्वायत्त परिषदं वंगु विहीवाः मोरङया बेलबारी दुवातय् घौछि चक्का जाम समेत याःगु दु। यदि थःपिनि माग पूरा मयात धाःसा कडा आन्दोलन यायेगु ख्याच्वः नं उमिसं बिउगु दु। थ्व लागा ऐतिहासिक रुपं नं धिमाल क्षेत्र खः धइगु पुष्टि जुयाच्वंगु दावी नं धिमाल स्वायत्त परिषदं याःगु दु ।
