मंकाः संकल्प प्रस्तावया बारे संयन्त्रय् सहलह
उच्चस्तरीय राजनीतिक संयन्त्रय् वर्तमान राजनीति गतिरोध अन्त्यया निंतिं प्रस्ताव याःगु मंकाः संकल्प प्रस्तावया बारे सहलह जूगु दु ।
सोमवाः सुथय् गुतत्याः इलं निसें नेपाली कांग्रेसया सभापति नापं संयन्त्रया संयोजक गिरिजाप्रसाद कोइरालाया छेँय् जूगु बैठकय् माओवादीया माग कथं राष्ट्रपतिया पलाः पाखें ब्वलंगु राजनीतिक संकट व उकीया निकासया बारे सहलह जूगु खः ।
राजनीतिक संकट ज्यंकेत स्वंगू प्रमुख दलत माओवादी, कांग्रेस व एमालेया निम्ह-निम्ह दुजः दुथ्याःगु कार्यदलं पेश या:गु मंकाः संकल्प प्रस्तावया बारे सहलह जुसां सहमति धाःसा जुइमफुत । बैठकं उगु कार्यदलयात हानं सहलह यानाः सहमति मालेत निर्देशन ब्यूगु दु ।
एमाले अध्यक्ष झलनाथ खनालं बिहीवाः च्वनीगु संयन्त्रया बैठकं मंकाः संकल्प प्रस्तावयात अन्तिम रुप बीगु खँ कनादिल । अथेहे वयेकलं सोमवाःया बैठकय् राजनीतिक गतिरोध अन्त्य यायेगु विषयलय् केन्द्रीत जूगु कनादिल ।
बैठकय् स्वंगू दलया प्रमुख नेता गिरिजाप्रसाद कोइराला, पुष्पकमल दाहाल 'प्रचण्ड' व झलनाथ खनाल लगायत नेतातय् ब्वति दुगु खः ।
