माओवादी लडाकुया नियन्त्रण कार्यविधि पारित
एकीकृत नेकपा (माओवादी) लडाकुया रेखदेख, समायोजन व व्यवस्थापन विशेष समितिं लडाकुया चेन अफ कमान्ड सम्बन्धी कार्यविधि आइतवाः पारित याःगु दु । समितिं चेन अफ कमान्ड यायेत गुम्ह दुजः दुगु सचिवालय दयेकीगु जूगु दु । लडाकुया प्रत्यक्ष निर्देशन, नियन्त्रण व रेखदेख नं सचिवायं हे याइगु व्यवस्था याःगु दु ।
आइतवाः च्वंगु विशेष समितिया बैठकं गुम्ह दुजः मध्ये माओवादी लडाकु, नेपाली सेना, नेपाल प्रहरी, सशस्त्र प्रहरी पाखें छम्ह छम्ह प्रतिनिधि सचिवालयलय् तयेगु व्यवस्था याःगु दु । अथेहे समायोज सम्बन्धी प्वम्ह विज्ञयात सचिवालयलय् दुथ्याकीगु खँ धाःगु दु । तर सचिवालय नेतृत्वया सम्बन्धय् अझ निर्णय मजूनी ।
माओवादीं चेन अफ कमान्डया सचिवालय संयोजकय् कमान्डर ननदकिशोर पुनया नां प्रस्ताव याःगु खःसा माओवादी बाहेकया समिति दुजःतय्सं पूर्व रक्षा सचिव वा स्वतन्त्र रक्षा जानकारयात सचिवालयया संयोजकय दयेकेमाःगु अडान काःगु खः ।
माओवादी लडाकुयात विशेष समिति मातहत हयेगु कार्यविधिलय् केन्द्रीय तहलय् गुम्ह दुजः दुगु सचिवालया व्यवस्था याःगु दुसाः उकीया मातहत मुख्य शिविरय् न्हय्म्ह दुजः दुगु व अस्थायी शिविरय् न्याम्ह दुजः दुगु संयन्त्रया व्यवस्था याःगु दु ।
शिविरय् दुगु संयन्त्रं लडाकुया गतिविधि लगायतया अनुगमन यायेगु नापं उकीया प्रतिवेदन सचिवालय मार्फत विशेष समितिलय् छ्वइ । उकीया सम्बन्धय् आवश्यक निर्णयत विशेष समितिं काइ ।
थ्व कार्यविधिं विधिवत् रुपय् लडाकुतय्त माओवादीया नियन्त्रणं मुक्त यानाः विशेष समितिया नियन्त्रणय् हःगु दु ।
