राज्य पुनर्संरचना समितिया प्रतिवेदनय् सहलह
संविधानसभा अर्न्तगतया राज्य पुनर्संरचना व राज्य शक्तिया बाँडफाँड समितिं तयार याःगु प्रारम्भीक मस्यौदालय् आइतवाः निसें सहलह सुरु जूगु दु ।
आइतवाःया संविधानसभाया बैठकय् न्ववानादिसें माओवादी सभासद् हितमान शाक्यं मस्यौदा भौगोलिक अवस्था व ल्यूनेलागू वर्गया अधिकार सुनिश्चित यायेगु कथं तयार जूगु धयादिल । वयेकलं मस्यौदा तयार याये न्ह्यः विज्ञत नाप तःक्व सहलह यानाः तिनि मस्यौदा तयार यानागु धयादिल ।
नेपाली कांग्रेसया सभासद् रामचन्द्र पौडेलं मस्यौदा वस्तुपरक मजूगु धयादिसें थुकी व्यापक सहलह यानाः वस्तुपरक ढंगं राज्य पुनर्संरचना यायेमाःगु धयादिल । एमालेया सभासद् थममाया मगरं दक्वं जातितय् पहिचान व समान अधिकारया आधारय् राज्य पुनर्संरचना यायेमाःगु खँ बः बियादिल ।
अथेहे नेकपा (माले)या सभासद् नीलम केसीं समितिं तयार याःगु मस्यौदाया सिमा, नां आदि छुं नं पाय्छी मजूगु तर्क तयादिल ।
सोमवाः निसें सुरु जूगु सहलह न्यान्हु तक न्ह्याइगु ज्याझ्वः दु ।
