नेपाः वयेत्यंगु विष्फोटक पदार्थ भारतय् ज्वन

येँ (सन्ध्या टाइम्स)/भारतया विहारी राजधानी पटनाय् ज्वंगु विष्फोटक पदार्थ थःपिनिगु मखु धकाः एनेकपा (माओवादीं) खण्डन याःगु दु। माओवादीं भारतया विरोध यानाच्वंगु इलय् लाक्क पटनाय् शंकास्पद रुपं ज्वंगु छगू ट्रक विष्फोटक पदार्थ माओवादीं झिके याःगु धकाः हल्ला याना बिउगुलिं माओवादीपाखें उकिया खण्डन याःगु खः ।

जे एच १० सी ४३८३ नम्बर या ट्रकय् तयाहःगु उगु विष्फोटक पदार्थ म्हिगः अनया प्रहरीं ज्वंगु खः। ज्वंपिं ड्राइभर विनास व खलासी अख्तर अन्सारीं थःपिंसं न्हापा न्हापा नं थज्याःगु पदार्थ यंकाच्वनागु खँ धाःगु दु। उकिं थ्व पदार्थ नेपाःया माओवादीं हे झिके याःगु जुइमाः धकाः हल्ला याना बिउगु खः ।

थ्वहे झ्वलय् मणि ढकाल नांया छम्ह मनुखं थ्व विष्फोटक पदार्थ राजस्थानया राजस्थान एक्स्प्लोसिव नांगु कम्पनीं न्याना हःगु खँ धाःगु दु। ढकाल उगु हे कम्पनीया नेपाः प्रतिनिधि खः। नेपाःया सिनर्जी हाइड्रो पावर डेभलपमेन्टपाखें उगु विष्फोतक पदार्थ झिके याःगु दावी नं वय्कलं यानादीगु दु। सिनर्जीयात न्हापा न्हापा थज्याःगु पदार्थ मालीबलय् नेपाली सेनां उपलब्ध याकीगु खः। तर माओवादीलिसे जूगु युद्ध विराम लिपा नेपाली सेनां थज्याःगु पदार्थ झिके यायेगु ज्या दिका तःगु दु। अय् जुयाः सिनर्जी थम्हं हे थ्व विष्फोटक पदार्थ झिके याःगु खँ नं धाःगु दु।
सिनर्जीं थ्व विष्फोटक पदार्थ झिके यायेत प्राप्त याःगु भ्वं पटनाय् क्यनेवं हे गाडी छुटे जुइगु दावी नं ढकालं याःगु दु।
आः भारतीय प्रहरीया हिरासतय् लानाच्वंगु उगु ट्रकय् इलेक्ट्रिक टेटोनेटर दुगु खःसां मेगु छु छु दु धइगु खँ धाःसा मसिउनि ।