सीमाय् जय भारत - जय नेपाल !
येँ (सन्ध्या टाइम्स)/माओवादीं न्ह्याकाच्वंगु स्वाधीनताया आन्दोलनया विरुद्ध सीमा लागाय् च्वंपिं स्थानीय मनूतय्सं समेत विरोध प्वंकाः नाका बन्द याना बीवं थ्व समस्या समाधान यायेत म्हिगः निगुलिं देय्या नागरिक समाजया पहलय् छगू मेलमिलाप ज्याझ्वः जुल। बाँके जिल्लाया जमुना नाकाय् जूगु उगु ज्याझ्वलय् छगू देय्या नागरिकं मेगु देय्या नागरिकयात गुलाफया स्वां बियाः मतिना व एकताया सन्देश बिउगु खः ।
थ्व झ्वलय् उमिसं निगुलिं देय्या राष्ट्रिय ध्वाँय् कालबिल यातसा निगुलिं देय्या राष्ट्रिय म्येँ 'सयौं थुंगा फूलका हामी...' व 'जन गण मन...' हालाः क्यंगु खः। ज्याझ्वः सिधयेकाः थवंथवय् मिठाई व च्या त्वनाः लसताय् कालबिल याःगु खः।
माओवादीपाखें भारतया अपमान यात धकाः अनया स्थानीय जनतां नेपाः दुहां वयेगु थःगु देशया नाका बन्द यानाः नेपाःमितय्त दुःख बिउगु खः। म्हिगः सद्भाव कार्यक्रम यायेधुंकाः उगु नाका हानं चायेकूगु खः। कार्यक्रम सिधयेकाः निगुलिं देय्या नागरिकत 'जय भारत - जय नेपाल' धइगु नारा थ्वयेकाः थःथःगु लँय् वंगु खः ।
