अमेरिकाय् संगीत ज्याझ्वः
येँ (सन्ध्या टाइम्स)/अमेरिकाय् च्वंपिं नेवाःतय्गु संस्था नेवाः अर्गनाइजेशन अफ अमेरिका (एनओए) पाखें थौं छगू सांगीतिक ज्याझ्वः यायेत्यंगु दु। राजधानी वाशिंगटनया बर्स्टन भिल्ला धाःथाय् 'नेपाल फेस्ट - ३' नां तयाः उगु ज्याझ्वः यायेत्यंगु खः ।
ज्याझ्वलय् नांजाःम्ह गायक प्रकाश श्रेष्ठ मूपाहां कथं उपस्थित जुयाः म्येँ हालादीगु व लिसें नांजाःगु संगीत ब्याण्ड '१९७४ एडी' या गितारिस्ट फिरोज स्याङ्देनं नं थःगु संगीत न्ह्यब्वइगु खँ ग्वसाः खलकं धाःगु दु ।
थ्व ज्याझ्वःया लागिं नेवाः अर्गनाइजेशन अफ अमेरिकां ताःई न्ह्यवंनिसें कुतः यानाच्वंगु खः। थुकिं मुंगु दांया छुं ब्व मांभासं आखः स्यनेगु ज्याय् खर्च यायेगु खँ धाःगु दु ।
