यलय् हानं साहित्यिक ज्याझ्वः
यल (सन्ध्या टाइम्स)/यलय् नं आः नेपालभाषा साहित्यया गतिविधि हानं शुरु यायेमाली धइगु ताः तयाः कवि क्याफेया ग्वाहालि कयाः मांभाय् पुचलं म्हिगः छगू साहित्यिक ज्याझ्वः यात ।
ज्याझ्वः साहित्यिक रचना पाठ यायेगु सिबें नं छम्ह साहित्यकारया रचना व व्यक्तित्व बारे चर्चा यायेगु कथं न्हूगु रुपं न्ह्याःगु खः। म्हिगः जूगु ज्याझ्वःया विषय खः 'नेपालभाषा ख्यलय् साहित्यकार शान्तराज शाक्य'। ज्याझ्वलय् केदार सितुं भाजु शान्तराज शाक्यया बाखं सफू 'पिहां मवःनिगु बाखं' यात कयाः टिप्पणी यानादीगु खःसा शाक्य सुरेनं वय्कःया निबन्धयात कयाः कुलादिल। अथे हे उपस्थितपिंपाखें राजेन मानन्धर, महेश्वर श्रेष्ठ, सरिता महर्जनपिंसं नं थःत ताःगु खँ कनादीगु खः। अन्तय् डा. पुष्पराज राजकर्णिकारं समग्र पक्षयात कयाः चर्चा यानादिल।
हिराकाजी महर्जनया सभापतित्वय् न्ह्याःगु उगु ज्याझ्वलय् कवि क्याफेया संयोजक राजेश वज्राचार्यं लसकुस यानादीगु खः। थ्व ज्याझ्वः धुंकाःलि यलय् नियमित साहित्यिक ज्याझ्वः याना वनेगु खँ ग्वसाः खलकं धाःगु दु ।
