सक्वया साली नदी मेला क्वचाल
सक्व (सन्ध्या टाइम्स)/दँय्दसं थें थुगुसी नं सक्वया साली नदीइ लछियंकं च्वंगु धलं दनेज्या म्हिगः क्वचाल। म्हिगः पुन्हि कुन्हु उगु कठिन धलं दनेज्या क्वचाःगु खः ।
धलं दने क्वचाःगु झ्वलय् म्हिगः साली नदीइ तःधंगु मेला नं जुल। दँय्दसं म्हिगःया पुन्हि कुन्हु सक्वया साली नदीइ तःधंगु मेला जुइगु खः। सक्व छगुलिं पलाः हे तयेथाय् मदयेक भक्तजन वइगु थ्व मेलाय् साली खुसिइ म्वः ल्हुत धाःसा थःपिंसं यानातयागु पाप कटौती जुया वनी धइगु विश्वास दु। उकिं म्हिगःया न्हि खुसिया ख्वाउँगु लखय् नं आपालं मनूतय्सं म्वः ल्हुइगु ज्या याइ। गुलिसिनं खुसिया लः कयाः ख्वाः जकसां सिला वनी ।
थुगुसी नं अन सलंसः मनूत लछियंकं धलं दंगु खः। धलं दनेगु ज्या म्हिगः क्वचाःगु खःसां म्हिगः हे बहनी जूगु तःधंगु होमय् सहभागी जुयाः व्रतालुत थौं तिनि छेँय् लिहां वंगु खः। सक्वय् साली नदीया नापसं माधव नारायणया न्हूगु कलात्मक देगः नं दनेधुंकूगु दु ।
थःपिंसं मनय् तयागु खँ पूवनी धयातःगु थ्व धलं दनेत येँ, यल, ख्वप बाहेक भ्वँत, पन्ति, वीरगंज, बुटवल, पोखरांनिसें तकं मनूत वयेगु याइ। कठिन धलं जूगुलिं गुलिखे मनूत विरामी तकं जुइ ।
