'इलय् हे संविधान निर्माण जुइगु सम्भावना म्हो जक'
मधेशी जनअधिकार फोरमया अध्यक्ष उपेन्द्र यादवं प्रमुख राजनीतिक दलत दथुइ उच्चस्तरीय राजनीतिक सहमति मजूसाः इलय् हे न्हूगु संविधान निर्माण मजुइगु खतरा अप्वयावंगु खँ धयादीगु दु ।
आइतवाः सुथय् लमहीलय् जूगु कार्यकर्ता भेलायात सम्बोधन यानादिसें वयेकलं वर्तमान राजीतिक घटनाक्रमया आधारय् २०६७ जेठ १४य् संविधान निर्माण जुइगु सम्भावना म्हो जक दुगु धयादिल । वर्तमान सरकार सेना समायोजन, संविधान निर्माण, शान्ति प्रकृयायात तार्किक निष्कर्षय् थ्यंकेत गम्भीर मजूगु धयादिसें सरकार संविधान निर्माण यायेगु ज्या स्वयां सत्ताया आयू ताःहाक यायेगु ज्याय् लगेजुयाच्वंगु दवपं बियादिल ।
वयेकलं न्हूगु संविधानय् अल्पसंख्यक, आदिवासी, मधेशी ल्यूनेला:गु समुदायया अधिकार सुनिश्चितताया निंतिं संघर्ष यायेमाःगु धयादिल । संविधानसभा अर्न्तगत राज्य पुनस्रंरचना समितिं न्ह्यब्वःगु संघीयताया नक्सा अवैज्ञानिक व अव्यवहारिक जूगु धयादिसें यादवं क्षेत्रीय स्वायत्तताया निंतिं थरुहट नाप मंकाः आन्दोलन यायेत्यनाःगु धयादिल । वयेकलं मंकाः आन्दोलनया प्रमुख उदेश्य इलय् संविधान निर्माण व मधेशी, जनजाति, दलित आदिया अधिकार सुनिश्चित यायेगु निंतिं जूगु धयादिल ।
