माओवादीयात थ्वहे सरकारय् दुथ्याकेमाः : देउवा
नेपाली कांग्रेसया वरिष्ठ नेता शेरबहादुर देउवां वर्तमान सरकारया विकल्प मदुगु धयादिसें थ्वहे सरकारय् एनेकपा (माओवादी)यात नं दुथ्याकेमाःगु खँ धयादीगु दु । वयेकलं नेपाली कांग्रेस थ्वहे सरकारया निरन्तरताया पक्षय् दुगु नं स्पष्ट यानादिल ।
बाराया सिमरा विमानस्थलय् आइतवाः सुथय् पत्रकारतनाप खँल्हाबंला यानादिसें वयेकलं यक्व सरकार परिवर्तन यायेमज्यूगु धयादिसें थ्वहे सरकारयात कांग्रेसया पूर्ण समर्थन दुगु धयादिल । कांग्रेसपाखे सरकारया नेतृत्व यानाच्वनादीम्ह उपप्रधानमन्त्री सुजाता कोइरालां वर्तमान सरकार परिवर्तन यायेमाःगु धापू पिहांवःगु इलय् देउवां थंज्याःगु प्रतिकृया बियादीगु खः ।
अथेहे वयेकलं उच्चस्तरीय राजनीतिक संयन्त्रय् मधेशवादी दल नापं नीन्यागू हे दलया प्रतिनिधितय्त दुथ्याकेमाःगु बिचाः प्वंकादिल । वयेकलं धयादिल, 'मधेशवादी दलत जक मखु, दक्वं राजनीतिक दलया प्रतिनिधित्व जुइमाः ।'
