सहिदतय्त लुमंकल
देय्यात तनाशाही व्यवस्थां मुक्त यायेत थःगु ज्यान हे त्याग याःपिं सहिदत लुमंकाः शनिवाः देय्न्यंक सहिद दिवस न्याकूगु दु । उकीया लसताय् येँ नापं देय्या थीथी थासय् सुथय् हे प्रभातफेरी याःगु खः ।
सहिद दिवसया हे लसताय् प्रधानमन्त्री माधवकुमार नेपालं येँया लैनचौरय् दुगु सहिद पार्कय् झायाः सहिदतय् झ्वातालय् स्वामाः देछानदीगु खः । उगु श्रदाञ्जली सभायात सम्बोधन यानादिसें प्रधानमन्त्री नेपालं सहिदया म्हगस साकार यायेत दलत दथुइ सहमति यानाः शान्ति प्रकृया व इलय् हे संविधान निर्माण यायेमाःगु धयादिल ।
अथेहे सहिद दिवसया लसताय् राष्ट्रपति डा. रामवरण यादवं छगू प्रेस विज्ञप्ति पिथनादिसें सहिदतय्सं क्यंगू लँपू कथं झी न्ह्यावनेमाःगु खँ न्ह्यथंनादिल ।
२००७सालय् जाहानीया राणा शासनया विरुद्ध धर्मभक्त माथेमा, दशरथचन्द, गंगालाल श्रेष्ठ, शुक्रराज शास्त्री सहित सहिदतय् बलिदान, २०४६ सालय् पञ्चायती व्यवस्था विरुद्धया आन्दोलनय् बलिदान ब्यूपिं सहिदतय्त लुमंकाः हरेक दँया माघ १६ गते सहिद दिवस न्यकीगु यानाच्वंगु दु ।
