'सहिदया सम्मान यायेत इलय् हे संविधान निर्माण'
संविधानसभाया अध्यक्ष सुवासचन्द्र नेम्वाङं सहिदया सम्मान यायेत इलय् हे न्हूगु संविधान निर्माण यायेमाःगु खँ धयादीगु दु । वयेकलं दलत सहिदतय् म्हगस कथं वनेमफुगु धयादिसें दलतय्त मिलेजुयाः इलय् हे संविधान निर्माण यायेत इनाप यानादिल ।
सहिद दिवसया झ्वलय् शनिवाः हेटौंडाय् जूगु श्रद्धाञ्जली ज्याझ्वलय् वयेकलं दक्वं दलयात जिम्मेवार जुयाः सहिदतय्सं क्यंगु लँपूइ न्ह्या: वनेत व जनतयात न्हूगु अनुभूति बीमाःगु इलय् दलत थःथःगु स्वार्थय् तक्यनाच्वंगु द्वपं बियादिल । वयेकलं राजनीतिक दलत दथुइ समझदारी मजूगुलिं जनता निराश जूगु धयादिल ।
अथेहे वयेकलं देशया राजनीतिक दलत दथुइ मेलमिलाप मजूगुलिं विदेशीत सक्रिय जूगु धयादिसें आः संविधान जारी यायेत ल्यं दनीगु इलय् गम्भीर जुयाः न्ह्याः वनेत दलतय्त इनाप यानादिल । नपां वयेकलं आःया राजनीतिक जटिलतायात सरल दयेकूसें न्हूगु संविधान निर्माणया ज्यायात केन्द्रीबिन्दु दयेकाः न्ह्याः वनेत राजनीतिक दलतय्त सुझाव बियादिल ।
संविधानसभा अध्यक्ष नेम्वाङं याकनं राजनीतिक दलत दथुइ समझादारी जुइमाःगु खँय् बः बियादिसें अथे जुसाः जक सहिदत प्रति सम्मान जुइगु धयादिल ।
