एमाले राज्य पुनर्संरचना आयोग गठन यायेगु पक्षय्
नेकपा (एमालें) संविधान अर्न्तगत राज्य पुनर्संरचना सम्बन्धी विषययात उच्चस्तरीय आयेग गठन यानाः वैज्ञानिक ढंगं निर्णय यायेमाःगु निष्कर्ष पिकाःगु दु ।
पार्टी मू ज्याकू बल्खुइ शनिवाः जूगु स्थायी समितिया बैठकं संविधानसभाया राज्य पुनर्संरचना व राज्यशक्तिया बाँडफाँड समितिं झिप्यंगू प्रदेश सहितया राज्य पुनर्संरचनाया खाका हचुवाया भरय् वःगु ठहर यासें थुकीया निर्णय उच्चस्तरीय राज्य पुनर्संरचना आयोग गठन यानाः निर्णय यायेमा:गु निष्कर्ष पिकागु दु ।
बैठक लिपाः एमाले अध्यक्ष झलनाथ खनालं राज्य पुनर्संरचना सम्बन्धय् थप बहस याये आवश्यक जूगु धयादिसें उच्चस्तरी राजनीतिक संयन्त्रय् सहलह कथं राज्य पुनर्संरचना आयोग गठनय् एमालें रचनात्मक भूमिका म्हितिगु कनादिल ।
अथेहे बैठकं सिन्धुलीलय् शुक्रवाः एमालेया केन्द्रीय दुजःतय्त माओवादीं नियन्त्रणय् काःगु घटनाया भर्त्सना याःगु दु । शुक्रवाः एमालेया केन्द्रीय दुजः नापं प्यम्ह एमाले कार्यकर्तायात सिन्धुलीइ माओवादीया भातृ संगठन वाईसीएलं स्वघौ नियन्त्रणय् काःगु खः ।
