थ्वहे सरकारं संसदीय निर्वाचन याकी : गच्छदार
उपप्रधानमन्त्री विजयकुमार गच्छदारं वर्तमान एमाले नेतृत्वया सरकारं हे संसदीय निर्वाचन याकीगु दाबी यानादीगु दु । वयेकलं थ्वहे सरकारं संविधान निर्माण याइगु व शान्ति प्रकृयायात निष्कर्षय् थ्यंकाः संसदीय चुनवा याकीगु धयादिल ।
रिपोटर्स क्लब पर्सां शनिवाः वीरगंजय् याःगु साक्षात्कार ज्याझ्वलय् वयेकलं उच्चस्तरीय राजनीतिक संयन्त्रय् नं वर्तमान सरकार परिर्वतनया छुं खँ मजूगु धयादिसें सरकार क्वदलीगु सम्भावना मदुगु धयादिल । नापं वयेकलं संयन्त्रया कार्यविधि कथं नं संयन्त्रय् सरकार परिर्वतनया खँल्हायेमज्यूगु धयादिल ।
वयेकलं अज्याःगु संयन्त्रय् प्रधानमन्त्री व मधेशवादी दलयात अनिवार्य रुपं दुथ्याकेमाःगु धयादिल । वयेकलं प्रधानमन्त्री व मधेशवादी दलया प्रतिनिधित्व बिना संयन्त्र पूर्ण जुइमफइगु धयादिल । गच्छदारं थः संयन्त्रया विरोधी मजूगु धयादिसें संयन्त्रं सहजकर्ताया भूमिका म्हितेमाःगु व देय्या दक्वं समस्याया निकास बीमाःगु धयादिल ।
मधेशी जनअधिकार फोरम लोकतान्त्रिया अध्यक्ष नापं जुयादीम्ह गच्छदारं मधेशी जनअधिकार फोरम नेपाल व थरुहट परिषद दथुइ जूगु कार्यगत एकतायात अपवित्रया संज्ञा बियादिल । अथेहे वयेकलं फोरम नेपालया अध्यक्ष उपेन्द्र यादवया तुलनाय् थः दक्वं खँय् अब्बल जूगु दाबी नं यानादिल । नापं थःगु पार्टीं एक मधेश एक प्रदेशया माग मत्वःतुगु स्पष्ट यानादिल ।
