लडाकुतय्त सेनाय् समायोजन यायेमज्यू : कोइराला
लडाकु व्यवस्थापन मजुसाः देय् असफल : ज्ञवाली
नेपाल कांग्रेसया कार्यवहाक सभापति सुशील कोइरालां माओवादी लडाकुतय्त नेपाली सेनाय् समायोजन यायेमज्यूगु खँ धयादीगु दु । वयेकलं छगू राजनीतिक बिचाः पाखें प्रशिक्षित लडाकुयात नेपाली सेनाय् समायोजन याःसा देशय् थप द्वन्द्व अप्वइगु धयादिल ।
प्रेस युनियन दाङं शनिवाः घोराहीलय् याःगु पत्रकार सम्मेलनय् कार्यवहाक सभापति कोइरालां सेना समायोजनया पलेसाः लडाकुतय्त वन वा सीमा सुरक्षावल दयेकेफइगु धयादिल । वयेकलं लडाकुया चाहना बमोजिम छुं नं व्यवसायलय् नं सहभागी यायेफइगु तर सरकारी सेनालय् छुं नं हालतं समायोजन यायेमफइगु धयादिल ।
अथेहे घोराहीलय् हे प्रेस चौतारीं याःगु पत्रकार नापलायेगु ज्याझ्वलय् नेकपा (एमाले)या सचिव युवराज ज्ञवालीं माओवादीया लडाकु व्यवस्थापन मजुसाः देय् असफल जुइगु ख्याच्वः बियादिल । वयेकलं शान्ति प्रकृया धइगु हे माओवादी लडाकुया व्यवस्थापन जूगुलिं नं उमिगु समायोजन, व्यवस्थापन व पुनस्थापना बिनाः शान्ति प्रकृया निष्कर्षय् थ्यनेमफइगु धयादिल ।
