राज्य पुनर्संरचना आयोग गठन याइगु
उच्चस्तरीय राजनीतिक संयन्त्रया शुक्रवाः च्वंगु बैठकय् राज्य पुनर्संरचना आयोग तत्काल गठन यानाः उकीया प्रतिवेदन संविधानसभायात लःल्हानाः सहलह यायेगु निर्णया याःगु दु । संविधानसभाया राज्य पुनर्संरचना व राज्य शाक्तिया बाँडफाँड समिति थःगु प्रतिवेदन लःल्हायेधुंकूगु इलय् संयन्त्रं आयोगया गठन यायेगु निर्णय याःगु खः ।
समितिं संविधासभाय् झिंप्यंगू प्रदेश सहितया राज्य संरचनाया खाका न्ह्यब्वःगु खः । उकी आः वइगु आइतवाः निसें सहलह जुइगु ज्याझ्वः दु । आयोग गठन सम्बन्धय् वइगु सोमवाः जुइगु बैठकं ठोस कार्ययोजना तयार याइगु निर्णय बैठकं याःगु दु ।
अथेहे बैठकय् सिन्धुलीया झागाझोगी गाविसय् वाइसीएलं एमालेया केन्द्रीय दुजः केशव देवकोटा सहितयात नियन्त्रणय् काःगु सम्बन्धय् छानविन यायेत स्वंगू दलीय अध्ययन कार्यदल गठन याःगु दु । कार्यदलय् कांग्रेसया पाखें हेमराज दाहाल, एमालेया विशमलाल अधिकारी व माओवादीया बसन्त माझी दु ।
कार्यदलयात छवाः दुने स्थलगत अध्ययन यानाः सत्यतथ्य थुइकाः संयन्त्रयात जानकारी यायेगु जिम्मेवारी ब्यूगु दु । शुक्रवाःया बैठकय् मुख्य थ्वहे विषयलय् सहलह जूगु खः ।
संयन्त्रया बैठक हरेक वाया बिहीवाः च्वनीगु निर्णय याःगु दु । अथेहे राजनीतिक गतिरोध अन्त्यया सम्बन्धय् सहलह यायेत सोमवाः सुथय् बैठक च्वनीगु जूगु दु ।
शुक्रवाःया बैठकय् संयन्त्रया संयोजक नापं कांग्रेस सभापति गिरिजाप्रसाद कोइराला, वरिष्ठ नेता शेरबहादुर देउवा, नेतात अर्जुननरसिंह केसी व कृष्णप्रसाद सिटौला माओवादी अध्यक्ष पुष्पकमल दाहाल 'प्रचण्ड', उपाध्यक्ष डा. बाबुराम भट्टराई व नारायणकाजी श्रेष्ठ 'प्रकाश' व एमालेया पाखें अध्यक्ष झलनाथ खनाल व महासचिव इश्वर पोखरेलया उपस्थिति दुगु खः ।
