मन्त्रीतय् हाकूगु ध्वाँय् क्यनेगु झ्वलय् ल्वापू
उपप्रधानमन्त्री विजयकुमार गच्छदार सहित न्याम्ह मन्त्रीतय्त वीरगंजय् हाकूगु ध्वाँय् क्यनेगु झ्वलय् मधेशी जनअधिकार फोरमया कार्यकर्ता व प्रहरी दथुइ ल्वापू जूगु दु ।
वीरगंजया मूर्ली चोकय् शुक्रवाः सुथंनिसें हाकूगु ध्वाँय् व व्यानर सहित च्वनाच्वंपिं फोमरया कार्यकर्तातय्त न्हिनय् झिंनिता इलय् प्रहरीं अनं चीकेगु कुतः यायेवं ल्वापू जूगु खः । ल्वापूइ फोरम वीरगंज वडा नं १६ ईकाई अध्यक्ष नुर आलम अन्सारीया छयोँ तज्याःगु दु । अथेहे प्रहरी नायव उपरीक्षक योगबहादुर पाल व फोरमया खुम्ह कार्यकर्ता सामान्य घाःपाः जूगु दु ।
अथेहे एनेकपा (माओवादी)या कार्यकर्तातय्सं मन्त्रीतय्त बाराया सिमरा व वीरगंजया पावरहाउसय् हाकूगु ध्वाँय् क्यना विरोध याःगु खः । माओवादी कार्यकर्तातय्सं नं सुथंनिसें थाय् थासय् हाकूगु ध्वाँय् ज्वना च्वनाच्वंगु खः । सुथनिसें हे हाकूगु ध्वाँय् ज्वना च्वनेवं अनया स्थिति तनावग्रस्त जूगु खः । लिपाः हाकूगु ध्वाँय् क्यनेगु झवलय् प्रहरीं प्यम्ह माओवादी कार्यकर्तायात ज्वना यंकूगु खः ।
फोरम लोकतान्त्रिकया बृहद कार्यकर्ता भेलाय् ब्वति कायेत उपप्रधानमन्त्री गच्छदार सहित पर्यटनमन्त्री शरदिसंह भण्डारी, कृषि व सहकारी मन्त्री मृगेन्द्रकुमार सिंह यादव, कृषि सहकारी राज्यमन्त्री करिमा बेगमम व भौतिक योजना सहायक मन्त्री कालावती पासवन वीरगंज थ्यंकादीगु खः ।
