संविधानसभाय् राज्य पुनर्संरचना बारे आइतवाःनिसें सहलह
येँ (सन्ध्या टाइम्स)/संविधानसभाया राज्य पुनर्संरचना नापं राज्यशक्ति बाँडफाँड समितिपाखें तयार याःगु राज्य पुनर्संरचनाया प्रस्तावित मस्यौदा नापं राज्य पुनर्संरचनाया थीथी विषययात कयाः संविधानसभाय् कंस आइतवाःनिसें सहलह जुइत्यंगु दु ।
उगु समितिइ यक्व हे सहलह लिपा झिंप्यंगू प्रदेश दुगु राज्य पुनर्संरचनाया प्रस्ताव बहुमतं पारित यानाः तयार याःगु खः। वहे प्रस्तावयात कयाः व्यापक रुपं सहलह जुइ धाःगु दु।
संविधानसभाया थीथी विषयगत समितित मध्यय् दकलय् महत्वपूर्णगु नापं चर्चाया विषय जुयाच्वंगु राज्य पुनर्संरचनाया प्रारम्भिक मस्यौदायात कयाः सहलह ब्याकेत्यंगु खः। उगु कथं संविधानसभाय् सभासदतय् दथुइ सहलह जुइगु इलय् नेपाःया आदिवासी जनजातितय्सं थःथःपिनि अधिकार नापंया प्रदेशयात कयाः थीथी कथंया ज्या यानाः दवाव बीगु नं तयारी यानाच्वंगु खँ आदिवासी जनजाति नेतातय्सं धाःगु दु ।
राज्य पुनर्संरचना समितिया उगु प्रस्तावयात कयाः थीथी राजनीतिक पार्टी नापं थीथी ख्यलं विरोध तकं याना हयाच्वंगु अवस्थाय् संविधानसभाय् थीथी समितिया प्रस्तावया सिबें थुगु प्रस्तावयात कयाः यक्व बहस जुइ धकाः मनूतय्सं अनुमान यानाहःगु दु ।
