सीमाय् नेपाःमितय्त अनावश्यक दुःख
येँ (सन्ध्या टाइम्स)/भारतीया सीमा सुरक्षा बल एसएसबीं नेपाः-भारत थीथी सीमा लागाय् वये-वने यायेमाःपिं सर्वसाधारण नेपाःमितय्त दुःख बीगु शुरु याना हःगुलिं थुकियात कयाः नेपालं भारतया सम्बन्धित अधिकारीतलिसे सहलह ब्याकूगु दु ।
उद्योग वाणिज्य संघ कन्चनपुरया छगू पुचः भारतया बनबासा वनाः अन च्वंपिं भारतीय अधिकारीतलिसे सहलह ब्याकूगु खः ।
कैलाली जिल्ला प्रशासनं नं भारतया सुरक्ष कर्मी व भन्सारया अधिकारीतलिसे थनिनिसें सहलह ब्याकेगु जुइ धकाः प्रमुख जिल्ला अधिकारी गेहनाथ भण्डारीं धयादीगु दु ।
भारतया सुरक्षाकर्मीतय्सं थौंकन्हय् नेपाःया महेन्द्रनगर, कैलाली व कन्चनपुर जिल्लालिसे स्वाःगु सीमा लागाय् चेकजाँचया त्वहः तयाः अनं वये-वने यायेमाःपिं नेपाःमितय्त दुःख बीगु याना वयाच्वंगु खः ।
एकीकृत नेकपा (माओवादीं) राष्ट्रिय स्वाधीनताया निंतिं धकाः छगू कथं भारत विराधी आन्दोलन यायेधुंकाः भारतं गौरीफन्टा, गड्डा चौकी, रुपैडिहाल नापं थीथी सीमा लागाय् नेपाःमितय्त वये-वने यायेगु ज्याय् हे कडा यानाहःगु दु ।
