संविधानया नितिं संयन्त्रया मुँज्या
येँ (सन्ध्या टाइम्स)/राजनीतिक गतिरोध अन्त्यया निंतिं नेपाली कांग्रेसया सभापति गिरिजाप्रसाद कोइरालाया नेतृत्वय् दयेकूगु उच्चस्तरीय राजनीतिक संयन्त्रया मुँज्या थौं च्वनीगु जूगु दु। कोइराला निवास महाराजगंजय् थौं सनिलय् अथे मुँज्या च्वनेत्यंगु खः ।
मुँज्याय् राजनीतिक गतिरोध अन्त्य यायेगु, शान्ति प्रक्रिया, न्हूगु संविधान दयेकेगु नापं थीथी विषययात कयाः सहलह जुइ धाःगु दु। थ्वसिबें न्ह्यः च्वंगु मुँज्यां थःगु आज्जु, कार्यविधि व आचारसंहिता पारित यानाः प्रधानमन्त्री माधवकुमार नेपालयात आमन्त्रित दुजः कथं संयन्त्रय् दुथ्याकेगु निर्णय याःगु खः। उगु संयन्त्रय् माओवादीया अध्यक्ष प्रचण्ड व एमालेया नायः झलनाथ खनाल दुजः कथं च्वनादीगु दु ।
