सीमा क्षेत्रय् जुयाच्वंगु गतिविधि प्रति माओवादीया आपत्ति
एकीकृत नेकपा (माओवादीं) सीमा क्षेत्रय् भारतीयतय्सं यानाच्वंगु प्रदर्शन व भारतीय सीमा सुरक्षा बलं नेपाःमितय्त यानाच्वंगु सास्ती प्रति सरकारं छुं प्रतिकृया मप्वंकूगु धासें आपत्ति प्वंकूगु दु ।
माओवादीया जारी स्थायी समितिया शुक्रवाः च्वंगु बैठकय् सीमा क्षेत्रय् नेपाःमितय्त जुयाच्वंगु दुर्व्यवहार व हेपाहा प्रवृतिया हे निरन्तरता जूगु व उकी सरकारं छुं हे पलाः मल्हवंगु धासें आपत्ति प्वंकूगु खः । अथेहे माओवादीयात उत्तेजित यायेत सीमा क्षेत्रय् प्रदर्शन जुयाच्वंगु नं दाबी याःगु दु ।
बैठक लिपाः संचारकर्मीत नाप खँल्हाबंला यानादिसें माओवादी प्रवक्ता दिनानाथ शर्मां भारतीय सीमा सुरक्षा बलं नेपाःमित पिडीत जुयाच्वंसां सरकारं छुं प्रतिकृया मब्यूगुलिं वर्तमान सरकार कतामरी सरकार जूगु पुष्टि जूगु कनादिल ।
अथेहे शुक्रवाःया बैठकय् माओवादी अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् स्थयी समिति दुजःत देव गुरुङ व वर्षमान पुन 'अनन्तं' थःथःगु बिचाः प्वंकादीगु खः । निम्हं नेता प्रचण्डाया प्रतिवेदन सकारात्मक जूगु धासें नागरिक सर्वोच्चता व राष्ट्रिय स्वाधिनताया आन्दोलनयात थप प्रभावकारी यानाः यंकेमागु खँय् बः ब्यूगु खः ।
