गोठाटार गोली काण्डया मेम्ह अभियुक्त ज्वन

येँया गोठाटार गोली काण्डया मेम्ह अभियुक्तयात प्रहरीं ज्वंगु दु । प्रहरीं उगु गोलीकाण्डया प्रमुख अभियुक्त रन्त लामाया जेठा काय् पाल्देन लामायात ज्वंगु दु । काभ्रेया कामीडाँडाय् सुलाच्वंगु इलय् बिहीवाः बहनी येँ नं वंगु महानगरीय प्रहरी परिसरया विशेष पुचलं अभियुक्त लामायात ज्वंगु खः । बिहीवाः हे लामायात ज्वना येँ हःगु दु ।

घटनाय् संलग्न आः रन्त सहित वयाः निम्ह काय् व मेपिं प्यम्ह अभियुक्त ज्वने ल्यं दनीगु खँ प्रहरीं धाःगु दु । नापं बिहीवाः ज्वंम्ह पाल्देनया पाखें अभियुक्त दक्वं न्हय्म्हसिया बारे महत्वपूर्ण सूचना प्राप्त जूगुलिं मेपिंत नं याकनं हे ज्वनीगु खँ धाःगु दु ।

गोठाटार काण्डय् पाल्देन सहितया पुचलं गोली क्येका च्यादँया मचा सन्तोष कार्की सीगु खःसा मेपिं निम्ह घाःपाः जूगु खः ।