उपराष्ट्रपति झायात क्रियाशील यायेगु विधेयक पारित
हिन्दी भासं शपथ कयादीम्ह उपराष्ट्रपति परमानन्द झायात क्रियाशील यायेगु संकल्प प्रस्ताव सहित व्यवस्थापिका संसदं अन्तरिम संविधानया न्हय्क्वःगु संशोधन विधेयक बहुमतं पारित याःगु दु ।
बिहीवाः च्वंगु व्यवस्थापिका संसदया बैठकं उपराष्ट्रपति झायात थःगु मां भासं पाखें शपथ कायेगु लँपू चायेकूसें विधेयकयात दुइ तिहाइ मतं पारित याःगु दु । वंगु साउनय् सर्वोच्च अदालतया आदेश कथं खस नेपाली भासं शपथ मकायेवं पदं निश्क्रिय जुयादीम्ह झायात आः मां भासं शपथ कायेगु लँपू चाःगु दु । वयेकलं आः शपथ कायेवं पदय् क्रियादील जुयादी ।
न्हूगु संविधान संशोधनं राष्ट्रपति, उपराष्ट्रपति व प्रधानमन्त्रीं नं थःथःगु मां भासं शपथ कायेफइगु व्यवस्था याःगु दु । थ्वस्वयां न्ह्यः राष्ट्रपति, उपराष्ट्रपति व प्रधानमन्त्रीं सरकारी ज्याखँया खस नेपाली भासं जक शपथ काये दइगु व्यवस्था दुगु खः ।
अन्तरिम संविधानया न्हय्क्वःगु संशोधन विधेयकय् नेमकिपाया सुनील प्रजापतीं संशोधन यायेमाःगु माग यानादीगु खः । वयेकलं सर्वोच्च अदालतया आदेश कथं संविधान बमोजिम शपथ मकाःगुलिं निश्क्रिय जुयादीम्ह उपराष्ट्रपति झाया पदय् न्हूगु निर्वाचन प्रकृया न्ह्याकेमाःगु धयादिसें संकल्प प्रस्ताव लितकायेत माग यानादीगु खः ।
अथेहे सद्भावना (आनन्ददेवी)या सरिता गिरी, दलित जनजनति पार्टीया विश्वेन्द्र पासवान व स्वतन्त्र सभासद् शदरु मियाँ नं संकल्प प्रस्तावया भाय्लय् असहमति प्वंकूसें संशोधन यायेमाःगु माग याःगु ख: ।
