उपप्रमया स्वकीय सचिव पदमुक्त
विदेशय् ज्या यायेत छ्वयाबीगु धकाः करोडौ तका मुंकाः बेपत्ता जूगु द्वपं लाःम्ह उपप्रधानमन्त्री नापं परराष्ट्रमन्त्री सुजाता कोइरालाया स्वकीय सचिव भरत सापकोटायात पदमुक्ता याःगु दु ।
परराष्ट्र मन्त्रालयं बिहीवाः छगू विज्ञप्ति पिथनाः सापकोटाया सम्बन्धय् सार्वजनिक संचार माध्यमय् थीथी नकारात्मक टीकटिप्पणी सहितया बुखँ पिहांवःगु सन्दर्भय् उपप्रम कोइरालां थौंया हे मिति निसें सापकोटायात प्रमुख स्वकीय सचिवया पदं मुक्त याःगु खँ न्ह्यथं:गु दु ।
साप्कोटाया बारे बिहीवाः छगू प्रमुख राष्ट्रिय दैनिकय् यक्व मनूतय्त विदेश छ्वयाबीगु धकाः करोडौं तका: ध्याबा ठगे याना: बेपत्ता जूगु धकाः बुखँ प्रकासित जूगु खः । बुखँ पिहांवयेवं सापकोटा बिहीवाः हे थःगु छेँ भरतपुरं येँय् झायादीगु खः ।
वयेकलं भरतपुर विमानस्थलय् संचारकर्मीत नाप खँल्हाबंला यानादिसें थः बिरामी जूगुलिं छेँ आराम यायेत वयाःगु धयादिसें डाक्टरतय् सल्लाह कथं छवाः तक मोबाइल नं स्विच अफ यानाच्वनाःगु कनादिल । वयेकलं छुं पत्रपत्रिकां थःगु चरित्र हत्या यायेगु कथं बुखँ पिकाःगु धयादिसें अज्याःगु पत्रिका विरुद्ध अदालतय् मुद्दा दायर यायेगु ख्याच्वः नं बियादिल ।
