नेम्वाङ पाखें प्रमुख दलया नेतात नापलात
संविधानसभाया अध्यक्ष सुवासचन्द्र नेम्वाङं प्रमुख दलया शीर्ष नेतातय्त नापलाना खँल्हाबंला यानादीगु दु ।
संविधानसभाया विषयगत समितिया मस्यौदाय् दुगु विवाद ज्यंकेगु विषयलय् अध्यक्ष नेम्वाङं एनेकपा (माओवादी), नेपाली कांग्रेस, नेकपा (एमाले) लगायत दलया शीर्ष नेतात नाप खँल्हाबंला यानादीगु दु । वयेकलं नेतातय्सं संविधान निर्माण यायेगु ई सतिना वंगुलिं विषयगत समितिलय् दुगु विवादत म्हो यानाः न्ह्या वनेत इनाप यानादीगु खः ।
वयेकलं बिहीवाः एमाले अध्यक्ष झलनाथ खनाल, माओवादी उपाध्यक्ष नारायणकाजी श्रेष्ठ 'प्रकाश', कांग्रेस कार्यवहाक सभापति सुशील कोइराला लगायत नेतातय्त नापलानादीगु खः । वयेकलं विवाद चीकेत नेतातय्सं प्रतिबद्धता प्वंकूगु व उकीं थः थप उत्साहित जूगु कनादिल ।
थीथी झिंछगू विषयगत समिति मध्ये च्यागू विषयगत समितिया अवधारणा व प्रारम्भीक मस्यौदाय् दलत दथुइ विवाद खनेदुगु दु । विशेष यानाः रज्यया शासकीय स्वरुप, निर्वाचन पद्धती, राज्य पुनसंरचना लगायत विषयलय् दलत दथुइ विवाद जुयाच्वंगु दु ।
