मन्त्रिपरिषदया बैठकं निम्ह सहायकरथीया बढुवा
मन्त्रिपरिषदया बैठकं नेपाली सेनाया निम्ह सहायकरथीयात उपरथीलय् बढुवा सहितया निर्णयत याःगु दु ।
बुधवाः च्वंगु मन्त्रिपरिषदया बैठकं सहायकरथी नरबादुर कँडेल व नरेन्द्र रावलयात उपरथीलय् बढुवा याःगु दु । निला न्ह्यः पश्चिम पृतना पोखरा व पूर्वी पृतना इटहरीया निमित्त प्रमखुया कार्यभार ब्यूपिं कँडेल व रावलया बढुवा लिपा पृतनापति जुयादीगु दु ।
बैठकं बिस्तृत शान्ति सम्झोता व अन्तरिम संविधानं व्यवस्थ याः कथं सत्य निरुपण व मेलमिलाप आयोग सम्बन्धी विधयेकयात सैद्धान्तिक सहमति ब्यूगु दु । विधयेकया मन्त्रिपरिषदं सम्बन्धित विषयगत समितलय् छ्वयेगु निर्णय याःगु दु ।
अथेहे बैठकं कैलालीया पत्रकार जगतप्रसाद जोशीया हत्याया छानबिन यायेत गठित समितिं तयार याःगु प्रतिवेदन कार्यान्वयन यायेगु व जोशीया छेँजःया झिगू लख राहत ग्वाहालि यायेगु निर्णय याःगु दु ।
थीथी माग यानाः आन्दोलन यानाच्वंपिं स्थानीय निकायया कर्मचारीत नाप वार्ता यानाः समस्याया समाधान यायेत सरकारं स्थनीय विकास रज्यमन्त्री गणेशबहादुर खड्कायात जिम्मेवारी ब्यूगु दु ।
नापं मन्त्रिपरिषदया बैठकं मधेश आन्दोलनया झ्वलय् सीपिं नीस्वम्हेसित न्हापा हे सहिद घोषणा यायेधुंकूगु व ल्यंदुपिनि विवरण संकलन यानाः सहिद घोषणा यायेगु निर्णय याःगु दु । अथेहे लुम्बिनी विकास कोषया दुजःलय् कपिलबस्तुपाखें सभाषद् बृजेशकुमार गुप्ता, रुपन्देहीपाखें मोहमद वकिल मुसलमान व नवलपरासीपाखें शशांक कोइरालायात नियुक्त या:गु दु ।
