फोरम व थरुहटं मंकाः आन्दोलन याइगु
एक मधेश एक प्रदेशया माग यानाः आन्दोलन यानाच्वंगु मधेशी जनअधिकार फोरम व थरुहट राज्यया माग यानाः आन्दोलन यानाच्वंगु थरुहट संघर्ष समितिं आः आः दक्वं तराईया भूभागयात स्वायत छगू प्रदेश दयेकेमाःगु माग यासें मंकाः आन्दोलन याइगु जूगु दु ।
बुधवाः येँ फोरम व थरुहटं मंकाः रुपं ग्वसाःग्वःगु पत्रकार सम्मेलनय् उमिसं पूर्वया झापा निसें पश्चिम कंचनपूरतक व उत्तर चुरे श्रृखंला निसें दक्षिणया भारतीय सीमासम्मया भूभागयात आत्म निर्णययात अधिकार सहित स्वायत्त प्रदखश दयेकेमाःगु खँ धाःगु दु ।
उमिसं छगू प्रदेश दयेके माःगुलिं निगूलिं पक्ष सहमत जूगु व मधेश व थारु आन्दोलनया भावनायात कदर यासें प्रदेशया नां लिपाः तय याइगु खा धाःगु दु । नापं उमिसं आन्दोलनया निंतिं न्यागू बुँदे सहमति नं याःगु दु ।
पत्रकार सम्मेलनय् फोरमया अध्यक्ष उपेन्द्र यादवं आः प्रदेशया नांया ल्यून मवंसें प्रादेशिक स्वायत्तता प्राप्त यायेगु ताः तयाः मंकाः आन्दोलन यायेत्यनागु धयादिल । वयेकलं राज्ययात तछ्यायेगु प्रवृतिया विरोधय् थःपिं छप्पँ जुयाःगु धयादिल । वयेकलं प्रदेशया नां मधेश, तराई व थरुहट न्ह्याःगु तःसां ज्यू धयादिसं नां महत्वपूर्ण मजुइ धयादिल ।
अथेहे थरुहटया संयोजक लक्ष्मण थारुं प्रमुख स्वंगू दलया एकात्मम रवैयाया विरुद्ध थःपिं छप्पँ जुयाःगु धयादिल । वयेकलं थःपिंत तछ्यानाः मोज याइपिं फोरम व थरुहट छथाय् च्वंगुलिं आश्चर्य चकित जुइगु दाबी यानादिल । वयेकलं मेची निसें महकाली तक छगू प्रदेशया निंतिं संघर्ष यायेगु धयादिल ।
आन्दोलनया ज्याझ्वः कथं प्रधानमनत्री व संविधानसभाया अध्यक्षयात ज्ञापनपौ लःल्हायगु, प्रचारप्रसार, अन्तरक्रिया, सभा लगायत ज्याझ्वः जुइगु खँ पत्रकार सम्मेलनय् जानकारी ब्यूगु खः ।
