थौं माओवादीं प्रमुख शक्ति क्वःछीगु

येँ (सन्ध्या टाइम्स)/माओवादीं नेपाःया आन्तरिक मामिलाय् समेत हस्तक्षेप यात धकाः भारतया विरोध याना हसेंलि उकिया प्रतिकार स्वरुप भारतय् नं माओवादीया विरोध शुरु जूगु दु। भारतया जोगबनी नाकाय् च्वंपिं स्थानीय भारतीय नागरिकं माओवादी अध्यक्ष प्रचण्डया पुत्ला समेत च्याकूगु दुसा भारतया विरोध याये दइ मखु धकाः नाराबाजी समेत याःगु दु ।

उमिगु नाराबाजीया झ्वलय् माओवादी कार्यकर्तातय्सं थःपिनि विरोध भारतीय शासक विरुद्ध जक खः भारतीय जनता व मुलुक प्रति मखु धकाः स्पष्ट याःगु खः। अथे खःसां उमिसं भारतया विरोध याःगु खँय् माओवादीं माफी मफ्वंतले नाका मचायेकेगु ख्याच्वः बिउगु दु। माओवादीं भारतया विरोध थथे हे न्ह्याकाच्वन धाःसा भारतीय सरकारपाखें हे नेपाःलिसे स्वाःगु मेमेगु नाकाय् नं स्थानीय जनतायात थथे हे उक्से यानाः नाकाबन्दीया ज्या याकेफुगु खँ धाःगु दु। थः विरुद्ध नेपालय् जुयाच्वंगु विरोध दिकेगु खःसा थ्वहे बांलाःगु उपाय जुइ फइगु बिचाः भारतं यानाच्वंगु दावी नं सूत्रया दु।
थ्वहे झ्वलय् माओवादीया स्थायी समितिया बैठक थौं च्वनेत्यंगु दु। बैठकं माओवादीया प्रमुख शत्रु सु खः धकाः किटान याइगु खँ नं धाःगु दु। माओवादीं उकुन्हु नागरिक सर्वोच्चताया आन्दोलन न्ह्याकाच्वंगु इलय् तक सामन्तवाद व साम्राज्यवादी शक्तियात थःपिति प्रमुख शत्रु खः धासें उकियात स्पष्ट किटान मयाःगु खः। तर थौं च्वनीगु बैठकं थ्व नं स्पष्ट किटान याइ धाःगु दु। अथे खःसां अझ नं प्रमुख शत्रु थ्वहे खः धकाः किटान यायेगु ज्याय् पार्टी दुने विभेद दनिगु खँ नं सूत्रं धाःगु दु। आन्तरिक विवादं यानाः प्रमुख किटान यायेगु ज्या अझ नं ढुलमुल जुइफुगु खँ धाःगु दु ।