ककसयात सक्रिय यायेगु सहमति
येँ (सन्ध्या टाइम्स)/ संविधान सभाया आदिवासी जनजाति सभासद सभा 'ककस' यात सक्रिय यानाः जक आदिवासी जनजातितय्गु हक अधिकार सुनिश्चित याये फइगु ठहर यासें आः ककसयात हे संविधानसभाय् सक्रिय यायेगु खँय् आदिवासी जनजाति सभासदत सहमत जूगु दु ।
नेपाल आदिवासी जनजाति महासंघ, महिला महासंघ नापं थीथी खलः पुचःया ग्वसालय् निन्हु तक धौख्यालय् जुया म्हिगः क्वचाःगु गोष्ठिइ उगु कथं सभासदपिं सहमिति जूगु खः। उगु गाष्ठिइ विदेसं वःपिं कानुन विज्ञ व प्राकृतिक श्रोट विशेषज्ञपिन्सं आत्मनिर्णया अधिकार, मौलिक अधिकार नापं आदिवासी जनजातितय्गु प्राकृतिक श्रोट साधनय् अधिकार नापं विश्वय् आदिवासी जनजातिया अवस्था नापं इमिगु भूमिका विषययात कयाः नेपाःया सभासदपिन्त प्रशिक्षण बिइगु नं याःगु खः ।
