थारू व मधेशी छथाय् च्वन
येँ (सन्ध्या टाइम्स)/राज्य पुनर्संरचना समितिं न्ह्यब्वःगु राज्य पुनर्संरचनाया प्रस्तावप्रति असहमति प्वंकुसें मधेशी जनअधिकार फोरम व थरूहट संघर्ष समितिपाखें मंकाः कथं संघर्ष याइगु जूगु दु ।
न्हापा न्हापा थरूहट व मधेशया विषययात कयाः मधेशवादी दल व थारू जाति दथुइ हे तःधंक ल्वापु जुया वयाच्वंगु खःसा लिपांगु इलय् विकास जूगु घटनाक्रमं यानाः आः थारू व मधेशवादी दलत हे छप्पँ जुयाः आन्दोलन यायेगु तयारी याःगु खः ।
थारूहट संघर्ष समिति व मधेशी जनअधिकार फोरमपाखें थौं हे छगू पत्रकार सम्मेलन यासें थ्व मंकाः आन्दोलनया सार्वजनिक घोषणा याइगु ज्याझ्वः दु। लुमंकेबहः जू, मधेशवादी दलतय्सं छगू 'मधेश छगू प्रदेश' धकाः माग याना वयाच्वंगु खःसा थारूतय्सं बिस्कं थरूहट स्वायत्त प्रदेशया माग यानाः आन्दोलन यानाच्वंगु खः। वंगु छुं दिं न्ह्यः जक थारू कल्याणकारिणी सभां नं थरूहट स्वायत्त प्रदेशया माग याना आन्दोलनया घोषणा यायेधुंकूगु दु ।
