पूवंके नं माः प्रमया प्रतिवद्धता
देशय् ब्वलनाच्वंगु राजनीतिक समस्या ज्यंकेगु निंतिं म्हीग प्रधानमन्त्री पुष्पकमल दाहाल प्रचण्डं व्यवस्थापिका संसदय् संवोधन यासें स्वलाया दुने कब्जा यानातःगु सम्पत्ति लित बीगु, स्ववाःया दुने वाईसीएलया अर्ध सैनिक संगठन विघटन यायेगु, न्हूगु शान्ति समिति गठन यायेगु, प्रेस स्वतन्त्रताय् प्रतिवद्धता प्वंकेगुया लिसें शिक्षाय् दलिततय्त बिया तःगु क्वमपालेगु प्रतिवद्धता प्वंकादीगु दु ।
खय्त ला न्हापा न्हापा नं प्रधानमन्त्रीपाखे थज्याःगु प्रतिवद्धता मप्वंकूगु मखु तर उकिया कार्यान्वयन मजुयाः देशय् राजनीतिक गतिरोध ब्वलंगु खः । तर आः प्रमं संसदय् वयाः ई समेत तोकेयानाः प्रतिवद्धता प्वंकूगु कारणं थ्व चाहिं कार्यान्वयन जुइ धकाः आम जनतां आशा याःगु दु ।
न्हापा न्हापा नं राजनीतिक पार्टीया नेतातय्सं तत्कालिन समस्या ज्यंकेगु निंतिं थज्याःगु आश्वासन बीगु याः । तर कार्यान्वनयन मजुइगुलिं हानं आन्दोलन याये मालाच्वंगु खः । अले थज्याःगु आन्दोलनं सरकारयात जक मखु आम जनतायात नं मिछंगु अवस्था ब्वलनीगु याना वयाच्वंगु खः । आः न्हापा न्हापाया अज्याःगु ज्याया पुनरावृत्ति मजुइकेत सरकारं थम्हं यानागु प्रतिवद्धता प्वंकेगु लँपुइ वनेमाःगु आवश्यकता थौं जुयाच्वंगु दु । थुखेपाखे प्रम व माओवादीया नायः जुयाच्वंम्ह प्रचण्डं अवश्य ध्यान बीगु विश्वास जनताया दु । अले थुकी प्रम गम्भीर नं जुइमाः । यदि इलय् प्रतिवद्धता पूवंके मफुत धाःसा हानं नं संविधानसभाया ज्या अवरुद्ध जू वनीगु खतरा दु । प्रमं प्रतिवद्धता पूमवंकूगु कारणं कन्हय् संविधान च्वयेगु ज्याय् समेत लिच्वः लाइगु खतरा दुगुलिं थुकी सरकार सतर्क जुइ हे माः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
