ल्याय्म्हतय्त आध्यात्मिक ज्ञान
येँ (सन्ध्या टाइम्स)/सामान्य प्रशासन मन्त्री प्रभाकर प्रधानाङ्गं देय्या स्यना वनाच्वंगु अवस्थापाखें ल्याय्म्ह पुस्तायात निराश मजुइकेगु खःसा उमित आध्यात्मिक ज्ञान बियाः सकारात्मक सोच विकसित यायेमाः धयादीगु दु। बौद्ध युवा कमिटीया १३ क्वःगु दँमुँज्याय् न्ववासें वय्कलं थ्व बिचाः प्वंकादीगु खः ।
ज्याझ्वलय् महानगरीय प्रहरी परिसर यलया प्रमुख व प्रहरी उपरीक्षक विक्रम थापां ल्याय्म्हतय्सं विदेशीया नकारात्मक खँपाखें अप्वः सयेकीगु जूगुलिं उमित आध्यात्मिक ज्ञानपाखें भिंम्ह नागरिक दयेकेमाः धयादिल। भिक्षु कौन्डण्यं ल्याय्म्हत छधी जुयाः आध्यात्मिक ज्ञानया माध्यमं न्ह्याः वंसां जक देशय् धाथें हिउपाः वइ धयाबिज्यात।
उगु हे ज्याझ्वलय् कमिटीया स्थापनाकालंनिसें निरन्तर क्रियाशिल जुयादीम्ह दांभरि अनिल महर्जनयात मन्त्री प्रधानाङ्गं हनापौ बियाः सम्मान यानादिल ।
कमिटीया अध्यक्ष रविन्द्र शाक्यया सभापतित्वय् जूगु उगु ज्याझ्वलय् मेपिं दुजःतय्सं नं न्ववानादीगु खः ।
