३२ दँ लिपा ग्वलय् जलद्यः

३२ दँ लिपा जलद्यः ग्वलय् हःबलय् थुगुसी अन छगू मेला थें हे जुल। १२ - १२ दँय् हयेमाःम्ह द्यः खःसां हयेत तसकं थाकुगु जुयाः ३२ दँ लिपा बल्ल बल्ल थुगुसी हयेत ताःलाःगु खः। अझ व नं पूवंक हये मफुनि हे धाःसां जिउ। ग्वलय् हयाः थ्व द्यः अन लत्या धइथें प्याखं हुइकेमाःगु खः। तर थुगुसी मुक्कं छन्हु जक न्हिछि प्याखं हुइकल। द्यःपिं थ्यंगु, पुजाआजा जूगु, लिहां वंगु फुक्कं यायेबलय् प्यन्हु जक ग्वलय् च्वन ।

थुलि अवधिया दुने अन निगू दर्जन स्वयां अप्वः दुगु बलि बिल। छम्ह दुगु पशुपति दुने नं बिउगु खः। पशुपतिइ बलि बीगु खँयात कयाः अन छुं मनूतय्सं विरोध नं याःगु खः। पशुपति देगःया क्वय् बलि बी जिउ लाकि मजिउ धकाः जूगु विवादया समाधान यायेत पशुपतिया मूलभट्टयाके वनाः समेत न्यनेकने याःगु खः। तर मूलभट्टं थः नकतिनि जक वयाम्ह जूगुलिं थनया परम्परा बारे बांलाक मसिउनि, थम्हं ला छुं न्यनेमाःसा मृत्युंजय आचाजुयाके न्यनेगु खः, छिकपिंसं नं वय्कःयाके हे न्यनादिसँ धकाः पन्छे जुयादिल। लिपा मृत्युंजय आचाजुयाके न्यना स्वःबलय् वय्कलं पशुपतिइ बलि बीगु नेवाःतय्गु पुलांगु परम्परा खः, थ्व बीके हे माः धकाः उजं जुइवं तिनि अन बलि बीगु ज्या जूगु खः।
पशुपति देगःया क्वसं दक्षिणध्वाखापाखे देगः व उन्मत्त भैरवया दथुइ उगु बलि बिउगु खः। बलि बिउगु इलय् बलियात चिनातःगु छपु पसूका यंकाः पशुपति महाद्यःयात थीकूगु खः। पशुपतिइ बलि बिउगु थ्व ज्यापाखें पशुपतिया परम्परायात मथूपिं आपालं मनूतय्सं नं थुकी रुची तया हःगु खने दत ।

जलद्यः ग्वलय् हःगु थ्वहे लसताय् जलद्यः गणं पशुपतियात व पशुपतिं जलद्यःयात पुजा बिउगु खः। थ्वहे पुजाया झ्वलय् जलद्यःपाखें पशुपतियात पुजा बिउबलय् दुगु बलि नं बिउगु खः ।

थ्व छगू जात्राया झ्वलय् जलद्यः गण प्यन्हु ग्वलय् च्वंबलय् फुक्कं यानाः करिब ६० लाख तका दां खर्च जूगु खँ ग्वसाः खलकं धाःगु दु। द्यः गणलिसे बाजं खलः, व्यवस्थापन पुचः नापं यानाः करिब निसःम्ह मनू दुगु खः। थ्व सकसितं हरिसिद्धिंनिसें हे भ्वय् नकाः हःगु खः। बलि, न्हिंन्हिं भ्वय्, पुजाज्वलं, द्यःया वसः आदि फुक्कं याःबलय् थुलि खर्चया ल्याःचाः पिहां वःगु खः ।

हरिसिद्धिया जलप्याखंयात नेपाःया हे दकलय् पुलांगु प्याखं धायेगु याः। अतिकं सिद्धिपूर्वक जक थ्व प्याखं पिकायेगु याइ। ग्वलय् दँय्दसं ख्वपया नवदुर्गा द्यः गण न्या लाकेगु धकाः हइगु चलन दु। झिंनिदँय् छक्वः जलप्याखं हइबलय् धाःसा ख्वपया नवदुर्गा द्यः हइ मखु। स्वीनिदँ लिपा थुगुसी बल्ल जलद्यः बिज्याकेफुगु खँ ग्वलया स्थानीय जनता हर्षित ला दु तर थुकिया लागिं तसकं हे खर्च तुइगु जुयाः मेगु झिंनिदँ लिपा हानं हये फइ वा मफइ धइगु खँय् धाःसा चिन्तित नं जुयाच्वंगु दु। थ्व छगू प्याखंया लागिं आः हे थुलि खर्च तूसा मेगु झिंनिदँ लिपा झं गुलि तू वनीगु जुइ? ग्वसाः खलःयात मात्र कल्पनां हे ईई पंका बिउ ।

- सुरेश