इहि याःवःम्ह मचायात न्याद्वः तका क्वसः
येँ (सन्ध्या टाइम्स)/मखंत्वाःया इहि परिवारं दँय्दसं थें थुगुसी नं वंगु माघ ८ व ९ गते तारिणी बहालय् इहि मुंकेगु ज्या जुल। ज्या झ्वलय् ४२ म्ह नेवाः मिसा मस्तय्त इहि याकूगु खः। इहि छन्हु न्ह्यः त्यंगः त्वाःया गणेद्यः पुजा याःगु खःसा ८ गते दुःसो, ९ गते कन्यादान व १० गते चतुर्थी पुजा याःगु खः ।
इहि परिवारपाखें थ्व इहि मुंकेगु ज्या याना वयाच्वंगु थुगुसी ४० दँय् क्यन। थःपिनि ज्या ४० दँय् क्यंगु लसताय् उगु इहि मुंकेज्याय् ब्वति काः वःपिं मिसा मस्त मध्ये दथुया नम्बरय् लाःम्ह मचा कथं ७ दँ दुम्ह मय्जु उरिशा रञ्जितयात ग्वसाः खलःया दुजः भाजु दिनेशानन्द राजोपाध्यायं न्याद्वः तका दां लःल्हाःगु खः। येँया चागलय् च्वंम्ह उदयकिरण रञ्जित व रीता रञ्जितया म्ह्याय्मचा उरिशायात पाजुम्ह पुजन रञ्जितया ल्हातिं उगु दां लःल्हाःगु खः। भाजु राजोपाध्यायं थ्व दां बैंकय् तयाः लिपा मचाया इहिपा जुइबलय् थःगुपाखें बियागु क्वसःया रुपय् लःल्हायेत इनाप यानादीगु दु ।
इहि परिवारपाखें निःशुल्क याइगु थ्व इहि मुंकेज्याय् सलंसः मस्तय्त ब्वति काइगु खःसां थौंकन्हय् व्यवस्थापन अःपुकेया लागिं न्यय्म्हया जःखः जक इहि याकेगु जुयाच्वंगु दु ।
