अनमिन म्याद हानं तनेगु प्रस्ताव
संयुक्त राष्ट्रसंघ अनमिन प्रमुख इयान मार्टिनं थौं सुथय् एमालेया पुलांम्ह महासचिव माधव नेपालयात नापलानाः अनमिनया म्याद थप यायेगु बारे खँल्हाबल्हा यानादीगु दु । नेपालया कोटेश्वरय् च्वंगु छेँय् जूगु उगु खँल्हाबल्हाय् अनमिन प्रमुख मार्टिनं नेपाःया शान्ति प्रकि्रयाय् अझ नं अनमिनया ग्वाहालि आवश्यक जुइगु बिचाः प्वंकादीगु खः । लुमंकेबह जू, न्हापा नं सरकारया इनापय् अनमिनया म्याद खुला थप याःगु खःसा थ्वहे वइगु माघ १० गते थ्व म्याद फुइत्यंगु दु ।
उखे संयुक्त राष्ट्र संघया सुरक्षा परिषदय बैठकय् नं राष्ट्र संघया महासचिव वान कि मूनं नेपालय् अनमिनया म्याद तनेगु बारे प्रस्ताव न्ह्यब्वयादीगु खँ सीदुगु दु । मूनं नेपाःया शान्ति प्रक्रिया निष्कर्षय् मथ्यंनिगु खँ धासें अनमिन नेपालय् मेगु खुला च्वनेमाःगु प्रस्ताव तयादीगु खः ।
नेपालय् न्ह्यानाच्वंगुशान्ति प्रक्रिया आशा याना थें सुधार मजूनि धासें वय्कलं चीधंगु ल्याखय् अनमिनयात तयेमाःगु खँ प्रस्तावय् धयादीगु दु ।
मूनं न्ह्यब्वयादीगु प्रस्तावय् नेपालय् शान्ति सम्झौता पूर्ण रुपं कार्यान्वयन मजूगु खँ नं दुथ्यानाच्वंगु दु । प्रस्तावय् नेपालय् न्ह्यानाच्वंगु शान्ति प्रकि्रयायात निष्कर्षय् थ्यंकेगु निंतिं राजनीतिक पार्टीत छप्पँ जुइमाःगु खँय् नं बः बियातःगु खँ सीदुगु दु ।
