खुद्रा व्यापार संघया स्वीक्वःगु साधारण सभा
येँ (सन्ध्या टाइम्स्)/नेपाल खुद्रा व्यापार संघया स्वीक्वःगु साधारण सभा वंगु सोमवाः संघया अध्यक्ष पवित्र वज्राचार्यया सभापतित्वय् क्वचाल ।
उगु साधारण सभाया उलेज्या पाहां कथं झायादीपिं राजस्व विभागया सचिव कृष्णहरि बाँस्कोटा, नेपाल चेम्बर अफ कमर्शया नायः सुरेन्द्रवीर मालाकार व नेपाल उद्योग वाणिज्य महासंघया उपाध्यक्ष भाष्कर राजकर्णिकारपिंसं यानादीगु खः ।
उगु साधारण सभाय् सरकारं आः नकतिनि करया दायरा वृद्धि यानाः च्याद्वः तका थ्यंकूगु व थुकिं खुद्रा व्यापारीतय्त समस्याय् लाकूगु खँय् सम्बन्धि निकायया ध्यानाकर्षण यासे खुद्रा व्यापारीतय् निंतिं करया दायरा क्वपालेत माग याःगु खः ।
साधारण सभाय् न्ववासें संघया अध्यक्ष पवित्र वज्राचार्यं सिन्डीकेट प्रणाली लागू यानाः बजाः भाः थकाइपिं व हाकु बजाः याइपिं ततःधंपिं व्यापारीतय्त कारवाही यायेमाःथाय् विभागं चिचिधंगु व्यापार याना वयाच्वंपिं खुद्रा व्यापारीतय्त कारवाही याना वयाच्वंगु खँय् सम्बन्धित निकायं याकनं थुखेपाखे बिचाः यायेत धयादिल ।
ज्याझ्वलय् सहभागि सकसिनं डिपार्टमेण्टल स्टोरया आकर्षण अप्वया वनाच्वंगु इलय् उपभोक्तातय्त आकर्षण यायेगु खःसा उकथंया हे पसः संचालन याना वनेमाःगु आवश्यकता नं महसुस याःगु खः ।
संघया महासचिव राजकुमार श्रेष्ठं वार्षिक प्रतिवेदन व कोषाध्यक्ष राजेन्द्रकृष्ण श्रेष्ठं न्ह्यब्वयादीगु खःसा सचिव अमुलकाजी तुलाधरं सुभाय् देछानादीगु खः ।
उगु हे साधारण सभाय् मदुम्ह गंगाबहादुर मानन्धर स्मृति कोषपाखें थुगुसीया एसएलसी परीक्षाय् उत्कृष्ट ल्याः हयादीपिं संघया दुजःपिनि छात्र छम्ह छात्रा छम्हेसित म्हतिं झिद्वः तका दां नं लःल्हाःगु खः ।
