प्रमपाखें विकास आयोजनाय् ग्वाहालि यायेत एडीबीयात इनाप
प्रधानमन्त्री माधवकुमार नेपालं मध्यपहाडी राजमार्ग लगायतया विकास आयोजनाय् ग्वाहालि यायेत एसीयाली विकास बैंक (एडीबी)यात इनाप यानादीगु दु ।
एडीबीया उपाध्यक्ष झाउ जियाउनाप बुधवाः सुथय् बालुवाटारय् जूगु खँल्हाबंलाय् प्रधानमन्त्री नेपालं पूर्वया पाँचथर निसें पश्चिमया दार्चुलातक स्वाइगु प्रस्तावित मध्यपहाडी राजमार्ग विकास योजनाय् ग्वाहालि यायेत इनाप यानादीगु खः । वयेकलं थुगु राजमार्ग रणनीतिक हिसावं तसकं महत्वपूर्ण जूगुलिं उकी एडीबीया तःधंगु ग्वाहालियात अपेक्षा यानाःगु धयादिल ।
अथेहे प्रधानमन्त्रीं येँया फोहोर व्यवस्थापन लगायत मेमेगु थीथी आयोजनाय् ग्वाहालि यायेत नं बैंकया उपाध्यक्ष झाउनाप इनाप यानादीगु खः । लिसःलय् झाउं प्रधानमन्त्रीया इनाप कथं एडीबी ग्वाहालि यायेत सकारात्मक जूगु खँ धयादगु खः । नापं उपाध्यक्ष झाउं ७५९ मेघावाट क्षमताया पश्चिम सेती जलविद्युत आयोजनायात नं एडीबीं ग्वाहालि यायेगु बचं बियादिल ।
उगु झ्वलय् त्रिभुवन विमानस्लया स्तर सुधार यायेगु, भैरवाय् अन्तर्राष्ट्रिय विमानस्थल निर्माण यायेगु, लुम्बिनी एकीकृत विकास आयोजना आदि आयोजनाया बारे नं खँल्हाबंला जूगु खः ।
