भारतय् माओवादी विरुद्ध प्रदर्शन
एकीकृत नेकपा (माओवादीं) राष्ट्रिय स्वाधीनता व भारतपाखें सीमा अतित्रमण याःगु विरोध यासें प्यंगूगु चरणया आन्दोलन यानाच्वंगु इलय् सार्वजनिक याःगु पोष्टरं थःपिनिगु राष्ट्रिय ध्वाँय्या अपमान याःगु धासें सीमा क्षेत्र जोगवनीलय् भारतीयतय्सं मंगलवाः प्रदर्शन याःगु दु ।
मंगलवाः सुथय् स्थानीय झिंछताः इलं निसें सुरु जूगु विरोध प्रदर्शनय् माओवादी अध्यक्ष पुष्पकमल दाहाल 'प्रचण्डं' भारतीय जनतानाप माफी फ्वनेमाःगु माग यासें जुलुस पिथंगु खः । नापं प्रदर्शनकारीतय्सं प्रचण्डया विरुद्ध नारा थ्वयेकेगु व लिपाः पुतला नं च्याकूगु खः ।
माओवादीं भारतं नेपाःया थीथी क्षेत्रय् सीमा अतिक्रमण याःगु विरुद्ध पोष्टर तिकाः प्रदर्शन याःगु खः । उगु पोष्टरय् भारतं सीमा अतिक्रमण याःगु तस्बिर सहित बुट व भारतया ध्वाँय् दुगु पोष्टर प्रकाशित याःगु खः ।
मंगलवाः जोगवनीइ जूगु प्रदर्शनय् ब्वति काःपिंसं थःपिं स्वतन्त्र भारतीय नागरिक जूगु व माओवादीया ज्यां नेपाः व भारत दथुइया सम्बन्धयात स्यंकेत्यंगुलिं विरोध यायेमाःगु खँ धाःगु दु ।
नाकाय् जूगु विरोध प्रदर्शनया कारणं निगूलिं देय् पाखें आवत जावत प्रभावित जूगु खः । नेपाः व भारतं नकाय् व्यापक सुरक्षाकर्मीत तैनाथ याःगु खःसा अन मंगलवाः छुं नं कथंया सवारी साधन नं चलेजुइमफुत ।
