गोठाटार गोलीकाण्डया अभियुक्त लामा निलम्बित
येँया गोठाटार गोलीकाण्डया मुख्य अभियुक्त रन्त लामायात एनेकपा (माओवादीं) पार्टीं निलम्बन याःगु दु । गुदँया मचा सन्तोष कार्कीयात गोलीं क्येकाः स्याम्ह अभियुक्त लामा माओवादी काभ्रे जिल्ला कमिटीया सल्लाहकार खः ।
सोमावाः माओवादी पार्टी जिल्ला सेक्रेटरी बमध्वजं छगू विज्ञप्ति पिथनादिसें घटनाय् पार्टीया नां स्वाःगु प्रति ध्यानाकर्षण जूगु खँ न्ह्यथंनादिसें उगु घटनाय् पार्टीया छुं नं संलग्नता मदुगु खँ धाःगु दु । व्यक्तिगत ल्वापूया कारणं जूगु घटनाय् पार्टीया नां स्वाःगु राजनीतिक पूर्वाग्रह बाहेक मेगू छुं जुइमफु खँ विज्ञप्तिइ न्ह्यथंनात:गु दु । माओवादीं घटनाय् पूर्वाग्रही ढंगं थःपिंत द्वपं ब्यूगु प्रति गम्भीर आपत्ति प्वंकूगु दु ।
छेँ द्यनेगु सम्बन्धी विवाद तच्वयेवं निर्माण व्यवसायी संघ काभ्रेया अध्यक्ष नं जुयादीम्ह लामा सहितया पुचलं गोली क्येकूगु खः । उगु गोलीकाण्डय् सन्तोष कार्की सीगु खसाः मेपिं निम्ह घाःपा जूगु खः ।
