जनजातिया गोलमेच सम्मेलन

समाचार विश्लेषण

येँ (सन्ध्या टाइम्स)/संविधानसभाया राज्य पुनर्संरचना समितिपाखें तयार याःगु १४ प्रदेशया नक्शायात उकी दुथ्याःगु फुक्क हे जातीय पुचःतय्सं विरोध याना हःगु दु। खास यानाः सम्बद्ध जातितय्सं थःपिंत बियातःगु लागा प्रयाप्त मजू धासें थ्व विरोध याःगु खः ।

तर सम्बद्ध जातितय्सं थ्व विरोध संविधानसभायात याःगु खःसां थ्व छगू कथं छगू जातिं मेगु जातियात याःगु अप्रत्यक्ष विरोध नं खः। थःगु प्रदेशयात लागा मगात धाःपिं जातितय्सं थःगु लागा क्वपालाः काल धकाः मेगु जातीय प्रदेशयात दोष बीगु यानाच्वंगु दु ।

उकिं थ्व समस्यायात धाथें समाधान यायेगु खःसा संविधानसभाया छुं निकाययात धयाः मखु थीथी जातिया प्रतिनिधित थःथःपिं हे च्वनाः छगू निकास पिकायेमाःगु आवश्यकता दु। छाय्धाःसां नेपालय् संघीय व्यवस्था हःगु हे थीथी आदिवासी जनजातिया पहिचानयात नं थाय् बीगु लागिं खः। उकिं थ्व व्यवस्थाय् छुं समस्या वःगु दुसा उकियात जातीय पुचःत हे जानाः समाधान यात धाःसा बांलाःगु निकास पिहां वइ। आदिवासीया पहिचान बचे यायेत संघीय व्यवस्था आवश्यक मदु धाइपिंसं थुकिया समाधान पिकाइ मखु ।

अय् जूगुलिं थ्व समस्या समाधान यायेत आः आदिवासी जनजातिया छगू गोलमेच सम्मेलन यात धाःसा उकिं समाधान पिकायेफु। जनजाति महासंघ वा मेगु छुं नं निकायं थुकिया लागिं पहल यायेफु। उगु सम्मेलनं छगू जातिं मेगु जातियात वःगु समस्या बारे न्यनेकने यानाः सर्वस्वीकार्य सहमति पिकाये फइ। यदि नक्शायात असन्तुष्टि प्वंकाः जनजातित हे ल्वात धाःसा थ्व संघीय प्रणाली विफल जुइगु निश्चित दु ।