माघ १९ कुन्हु २४ घण्टे धर्ना
येँ (सन्ध्या टाइम्स)/क्वःछिनातःगु इलय् हे न्हूगु संविधान निर्माण यायेत दबाव बीगु निंतिं नागरिकस्तरं थ्वहे वइगु माघ १९ गते मंगलवाः संविधानसभाया भवन न्ह्यःने लगातार चछिन्हिछि धर्ना बीगु जूगु दु ।
लोकतन्त्र व शान्तिया निंतिं नागरिक आन्दोलनया आह्वानय् न्हूगु संविधानया पक्षधर नागरिकत उगु २४ घण्टे धर्नाय् च्वनेत्यंगु खः। लोकतन्त्र व शान्तिया निंतिं नागरिक आन्दोलनया कजि डा. देवेन्द्रराज पाण्डें 'सन्ध्या टाइम्स'यात कनादी कथं तत्कालिन जुजु ज्ञानेन्द्रं 'कू' याःगु न्हि कुन्हु लाकाः न्हू बानेश्वरया संविधानसभा भवन न्ह्यःने उगु धर्ना च्वनेत्यंगु दु ।
आन्दोलनया कजि डा. पाण्डें २०६२-६३ या जनआन्दोलनया भावना कथं संघीय गणतान्त्रिक नेपाःया समावेशी कथंया न्हूगु संविधान जारी यायेमाः धकाः दवाव बीगु निंतिं अथे धर्ना च्वनेत्यनागु खँ न्ह्यथँसें उगु धर्नाय् ब्वति कयादीत सकलसितं इनाप नं यानादीगु दु ।
